Семейный молитвослов. Молитвы о здоровье детей и мире в семье - стр. 12
Молитва супругов о даровании детей
Услыши, Боже Милосердый и Всемогущий, моления наша, буди милостив нам и ниспосли нам благодать Твою. Яко Давый закон умножения рода человеческаго, буди и нам милостивным Покровителем, да помощию Твоею исполнится и на нас Тобою установленное. Ты властию Твоею из несущаго вся сотворил еси положил еси начало всему, в мире сущему – сотворил еси человека по образу Своему и тайною высокою освятил еси союз супружества в предуказание тайны единения Христа с Церковию Своею.
Призри, Милосерде, на рабов Твоих сих, союзом брака соединенных и о помощи Тя умоляющих, да будет на них милость Твоя, да будут яко лозы плодовиты и да увидят сыны сынов своих даже до третияго и четвертаго рода, и, старости достигше, войдут в царство небесное, милостию Господа нашего Иисуса Христа, Ему же подобает всякая слава, честь и поклонение со Святым Духом вовеки. Аминь.
В супружеском неплодстве или бесчадии молятся святым праведным Иоакиму и Анне.
Молитва ко Господу женщины, ожидающей рождения чада
Боже Великий, Животе и жизни Подателю и Хранителю! Благодарю Тя, яко милостию Твоею и мене, смиренную рабу Твою, причастной соделал еси благодати чадородия, се бо имам плод чрева. Обаче веси, Господи, яко боюся, да не како грех моих ради люте постражду раждающи, и того ради к милосердию Твоему прибегаю.
Не молю Тя, да избавиши мя участи всего рода нашего женскаго, ему же определил еси в болезнех раждати чада, общий бо закон есть нам, согрешившим. О сем же молю Тя: егда приидет час мой, даждь ми ослабу и разрешение нетрудное, избави мя от болезней непосильных. Исполни, Господи, желание сердца моего, вкупе же и желание супруга моего, его же дал ми еси. Даждь нам радость рождения новаго человека в мир Твой. Да явится младенец цел, здрав и крепок, и да ктому не помним скорби за радость, благодатию и щедротами Единороднаго Сына Твоего, Иже нас ради воплотися от пречистых кровей Марии Девы, в ложеснах носим бысть и плотию рождение восприят, Ему же слава подобает со Святым Духом вовеки. Аминь.
О благополучном разрешении от бремени тропарь великомученице Екатерине, глас 4
Добродетельми, яко лучами солнечными, просветила еси неверныя мудрецы, и якоже пресветлая луна ходящим в нощи, неверия тьму отгнала еси, и царицу уверила еси, вкупе же и мучителя обличила еси, богозванная невесто, блаженная Екатерино; желанием востекла еси в небесный чертог, к Прекрасному Жениху Христу, и от Него царским венцем венчалася еси; Емуже со Ангелы предстоящи, за ны молися, творящия пречестную память твою.
Молитва о детях ко Господу
Господи Иисусе Христе, Сыне Божий, молитв ради Пречистыя Матере Твоея, услыши мя, недостойную рабу Твою (имя)\ Господи, в милостивей власти Твоей суть чада моя (имена), помилуй и спаси их, имене Твоего ради. Господи, прости им вся согрешения, вольна я и невольная, яже сотворша пред Тобою.
Господи, настави их на путь истинный заповедей Твоих, и вразуми, и просвети светом Твоим во спасение души и во исцеление тела. Господи, благослови их в доме, и вне дома, в поле, в трудех, и в пути и на всяком месте владычества Твоего. Господи, сохрани их под кровом Твоим святым от летящия стрелы и пули, от ножа и меча, яда, огня, потопа, от смертоносный язвы и от напрасныя смерти.